پولیسێن دهۆكێ ئامارا 2019 و پلانا 2020 راگەهاند
بەری نیڤرۆ یا دووه سێ شەمبی24/12/2019 ل رێڤەبەریا گشتی یا پولیسێن پارێزگەها دهۆكێ د كونگرەیەكێ رۆژنامەڤانی دا ئامارا سالا (2019) هات راگەهاندن و باس ل پلانا سالا 2020 هات كرن.
موقەدم، هێمن سلێمان، پەیڤدارێ رێڤەبەریا گشتی یا پولیسێن پارێزگەها دهۆكێ د كونگرەیێ رۆژنامەڤانی دوپات كر: "ل سالا (2019) ل هەمو بنگەهێن پولیسان یێن سەر ب پارێزگەهێ ڤە (13837) دوز (دعوە) هاتنە توماركرن و ب رێژا (92%) ئەو دوزە ب دوماهی هاتنە و چارەسەر بونە و ب رێكا سیستەمێ دیڤچونا لێگەریانا تومەتباران كو ئەڤ سیستەمە سەرانسەری كوردستان و عیراقێ بتنێ ل دهۆكێ هەیە لێگەریان بو (326,790) كەسان هاتیە كرن و بتنێ ل سالا (2019) ب رێكا هەمان سیستەمی (219) كەس وەكو تومەتبار هاتنە دەستەسەركرن".
گوت ژی: "ل دور تاوانێن ڤەشارتی (679) تاوان هاتنە ئاشكرا كرن كو (18) تاوان یێن كوشتنێ نە و (604) تاوانێن دزیێ نە و (1998) تاوانێن فێلبازیێ و (38) تاوانێن ماددێن بێ هوشكەر و (497) تاوانێن خراب بكارئینانا تورێن پەیوەندیان و(1052) كێشێن ب شەر چونێ و (530) تاوانێن مەی ڤەخوارنێ ل جهێن قەدەغەكری، كو ئەڤ هەمو ئامارە ل سالا (2019) ژلایێ بنگەهێن پولیسێن مە ڤە هاتنە توماركرن.
هەمان پەیڤداری ئەو چەندە ژی د كونگرەیێ رۆژنامەڤانی دا دیاركرن: پولیسێن مە ب هەڤكاریا پولیسێن باژێرڤانیان و لیژنێن قایمقامیێ شیانە (830) جهان ئاگەهدار بكەن و (224) جهان مینا خارنگەه و كافیتریا بو چەند رۆژان دابێخن ژبەر كو پێگیر نەبونە ب رێنمایان و گوت ژی: جهێ دلخوشیا مە یە ب هاریكاریا خەلكی و پولیسان د سالا (2019) دا هژمارەكا زور پا پارەی و زێر و موبایلان ئەوێن بەرزە دبن بو خودانێن وان هاتنە ڤەگەراندن.
موقەدم هێمن سلێمان پەیڤدارێ پولیسێن پارێزگەها دهۆكێ دوپاتیل سەر وێ چەندێ ژی كر: بو سالا نوی پلانا مە یا سەرێ سالێ ئەو چەندە بویە كو كومبونەكا بەفرەه هاتیە دانان كو ئەڤ رۆژێن بهێنڤەدان و جهێن ئاهەنگ و خەلك لێ كوم دبیت هەمو پولیسێن مە كو (4) هزار پولیس دێ د ئامادەباشیا كاری دا بن ژ پێخەمەت پاراستنا گیان و سامانێ خەلكێ مە و پولیسێن مە هەردەم د خزمەتا خەلكی دا نە ژ پێخەمەت پاراستنا ئێمناهی و ژیانا خەلكی.